Romo lagðist undir hnífinn

Tony Romo, leikstjórnandi Dallas Cowboys í NFL-deildinni, á erfiða mánuði fram undan eftir að hafa gengist undir aðgerð vegna bakmeiðsla í dag.

Fyrr í vikunni héldu fjölmiðlar vestanhafs því fram að tímabilið væri búið hjá Romo vegna bakmeiðsla sem tóku sig upp í 24-23 sigri Dallas á Washington Redskins á sunnudaginn.

Jason Garrett, þjálfari Dallas, sagði það ekki rétt og að enn væru vonir bundnar við að hann gæti spilað með liðinu í lokaumferð deildakeppninnar um helgina. Dallas mætir þá Philadelphia Eagles í hreinum úrslitaleik um sæti í úrslitakeppninni.

Í dag varð endanlega ljóst að Romo spilar ekki meira á árinu. Hann þjáist af hryggþófaraski (e. herniated disc) og fór í dag í sína aðra aðgerð á baki á átta mánuðum.

Romo, sem er 34 ára gamall, hefur verið aðalleikstjórnandi Dallas síðan 2006 en tókst aldrei að leiða lið sitt til sigurs í deildinni. Romo þykir í hópi betri leikmönnum deildarinnar í sinni stöðu en síðustu ár hefur lið Dallas oft brugðist þegar mest á reynir.

Romo kláraði þó leikinn gegn Washington um síðustu helgi þrátt að hafa spilað þjáður síðasta fjórðunginn. Dallas skoraði þá tíu stig og tryggði sér eins stigs sigur sem fyrr segir.

Garrett sagði í dag að hann reiknaði með því að Romo verði kominn aftur á fullt fyrir upphaf næstu leiktíðar í NFL-deildinni.