Erfiður tvíhöfði hjá Framkonum í Ungverjalandi

Kvennalið Fram heldur í dag til Ungverjalands þar sem framundan eru tveir leikir við heimakonur í Köfem Sport Club í 3. umferð EHF-bikarsins. Fram vann sannfærandi sigur á liði Olympia frá London í 2. umferð en báðir leikirnir fóru fram hér á landi.

Framarar, sem urðu Íslandsmeistarar í vor, þekkja ágætlega til ungversku mótherjanna. Liðin mættust fyrir tveimur árum í Evrópukeppni bikarhafa en þá notaðist liðið við nafnið Alcoa FKC. Líkt og nú fóru báðir leikirnir fram ytra og unnu Ungverjarnir fjórtán marka sigur samanlagt.

Köfem situr í 5. til 6. sæti efstu deildar og verður vafalítið við ramman reip að draga fyrir Safamýrarstúlkur því ungverska kvennadeildin þykir afar öflug.

Sem dæmi um styrkleika deildarinnar má nefna lið eins og Györi sem er taplaust í sínum riðli í meistaradeild Evrópu í vetur.

Fyrri leikurinn fer fram á föstudaginn klukkan 17 að íslenskum tíma. Sá síðari verður á laugardaginn klukkan 14.