Strákarnir skipta verðlaunafénu á milli sín

Einar Þorvarðarson, framkvæmdarstjóri HSÍ, segir að leikmenn handboltalandsliðsins fái engar fyrirframákveðnar bónusgreiðslur fyrir góðan árangur á stórmótum í handbolta.

Þekkt er að leikmenn stórra þjóða fái bónusa fyrir verðlaun á stórmótum en norska handknattleikssambandið tilkynnti sínar bónusgreiðslur í dag.

Það hefur ekki tíðkast að leikmenn íslenska landsliðsins fái greitt sérstaklega fyrir árangur á stórmótum.

„En ef HSÍ fær verðlaunafé verður því skipt á milli leikmannanna,“ sagði Einar í samtali við Vísi í dag.