Fær ekki að horfa á leikinn í steininum

Aaron Hernandez, fyrrum leikmaður New England Patriots, fær ekki að horfa á sitt gamla lið spila til úrslita í AFC-deildinni í NFL annað kvöld.

Hernandez var handtekinn í sumar, grunaður um að hafa orðið manni að bana. Hann var ákærður og bíður nú réttarhalda í fangelsi. Þess má geta að Hernandez liggur einnig undir grun um að hafa banað tveimur til viðbótar árið 2012.

„Honum er ekki heimilt að horfa á sjónvarp,“ sagði fulltrúi lögreglunnar í Bristol, þar sem Hernandez er í fangelsi.

„Hann fréttir kannski af leiknum í gegnum fangaverðina eða þá ef aðrir fangar tala hátt um leikinn,“ sagði hann enn fremur.

Hernandez fær ekki að eiga samskipti við aðra fanga í fangelsinu og er haldið í klefa sínum í 21 klukkustund á sólarhing.

Patriots mætir Denver Broncos í úrslitaleik AFC-deildarinnar annað kvöld en leikurinn hefst klukkan 20.00 og er í beinni útsendingu á Stöð 2 Sport.

Seattle Seahawks og San Francisco 49ers eigast svo við í úrslitaleik NFC-deildarinnar klukkan 23.30. Sigurvegarar leikjanna mætast svo í Super Bowl eftir tvær vikur.