Jörðin skalf þegar Lynch skoraði snertimark

Jarðskjálftafræðingar vestanhafs telja að áhorfendur á leik Seattle Seahawks  og New Orleans Saints hafi framkallað smávægilegan jarðskjálfta á leik liðanna í úrslitakeppninni í NFL-deildinni á laugardaginn.

Seattle Seahawks vann leikinn 23-15 og eru því komnir í úrslit í sinni deild.

Leikurinn fór fram í miklu roki og rigningu í Seattle og var lítið kastað í leiknum. Marshawn Lynch, hlaupari Seattle, fór mikinn og skoraði tvívegis en þegar hann skoraði síðara snertimark sitt í leiknum, og kom Seahawks í 22-8, varð allt vitlaust á vellinum.

Hér má sjá myndband sem sýnir það helsta frá leiknum á laugardaginn og meðal annars síðara snertimark Lynch.

Lynch skoraði magnað snertimark árið 2011, og þá aftur gegn  New Orleans Saints, sem orsakaði einnig smávægilegan skjálfta á svæðinu en það snertimark má sjá hér.

Hér að neðan má sjá færslu frá jarðskjálftastofnun í Seattle en þar má sjá hreyfinguna á jörðinni þegar snertimark Lynch var skorað.

Lynch TD shows up all three seismometers. This ground motion NOT fan noise #BeastQuake #GoHawks #NOvsSEA pic.twitter.com/d3YY4sP2F5

— PNSN (@PNSN1) January 11, 2014