Stjórnarformenn Porsche og Volkswagen kærðir

Sjö vogunarsjóðir hafa höfðað mál gegn Wolfang Porshe, stjórnarformanni bílaframleiðandans Porsche, og Ferdinand Piech, stjórnarformanni Volkswagen.

Sjóðirnir krefjast 1,8 milljarða evra, sem jafngildir 280 milljörðum króna, í bætur eftir að hætt var við kaup Porsche á Volkswagen árið 2008. Viðskiptablaðið greinir frá.

Stjórn Porsche tilkynnti árið 2008 að fyrirtækið réði yfir 74,1 prósentum hlutafjár í Volkswagen í gegnum kauprétti og samninga. Til stæði að ná 75 prósentum hlutafjár og taka fyrirtækið yfir.

Að sögn Bloomberg-fréttastofunnar sönkuðu fjárfestar að sér hlutabréfum í Volksvagen og hækkaði gengi þeirra mikið í kjölfarið. Kaupin gengu hins vegar ekki eftir á sínum tíma en um ári síðar opinberuðu stjórnir fyrirtækjanna samrunaáætlun.