Saksóknarar í máli suðurafríska spretthlauparans Oscars Pistorius segjast hafa sannanir undir höndum þess efnis að hann hafi sagt öryggisvörðum að allt væri í lagi eftir að kærasta hans, Reeva Steenkamp, var skotin til bana í febrúar á síðasta ári.
Fréttastöðin eNCA hefur gögn undir höndum frá saksóknurunum þar sem fram kemur að öryggisverðir hafi hringt í Pistorius og spurt hann hvort allt væri í lagi. Hann hafi staðfest það og ekki óskað eftir aðstoð þeirra.
Pistorius hefur verið formlega ákærður fyrir að myrða Steenkamp og hefjast réttarhöld yfir honum í næsta mánuði. Hann á yfir höfði sér lífstíðarfangelsi verði hann sakfelldur, en hann hefur haldið fram sakleysi sínu frá upphafi. Hann segist hafa skotið Steenkamp þar sem hann hafi haldið að hún væri innbrotsþjófur.
Saksóknarar hafa þó fallist á þá skýringu Pistoriusar að hann hafi ekki verið búinn að setja undir sig gervifæturna þegar hann skaut Steenkamp í gegnum baðherbergishurð á heimi hlauparans. Þá er því haldið fram að Pistorius hafi verið einum og hálfum metra nær hurðinni en rannsókn lögreglu leiddi í ljós.
