Greining á styrkleikum og veikleikum Gunnars

Eins og landsmönnum er kunnugt um mætir Gunnar Nelson aftur í búrið næstkomandi laugardag þegar hann berst við hinn rússneska Omari Akhmedov. Bardaginn fer fram í O2 Arena í London og verður í beinni útsendingu á Stöð 2 Sport! En hverjir eru styrkleikar og veikleikar Gunnars?

Gunnar Nelson fæddist á Akureyri í júlí 1988 og er hann því 25 ára gamall. Gunnar heillaðist snemma af bardagaíþróttum frá áhorfi sínu á Bruce Lee myndir ásamt föður sínum, Haraldi Dean Nelson. Eftir að hafa æft hokkí og fótbolta fékk hann loks að æfa karate þegar hann var 13 ára gamall. Hann var ekki lengi að slá í gegn þar og varð m.a. Íslandsmeistari í Kumite bardaga þrjú ár í röð.

Þegar Gunnar var 17 ára ákvað hann að segja skilið við karate og hóf að stunda brasilískt jiu-jitsu ásamt öðrum stofnfélögum bardagaklúbbsins Mjölnis. Fljótlega kom í ljós að glíman hentaði Gunnari ákaflega vel og varð hann fljótt góður þar.

Eftir aðeins fjögur ár í íþróttinni hlaut hann svarta beltið, en afar sjaldgæft er að fá svart belti í BJJ svo snemma. Meðal maðurinn er um 10 ár að næla sér í svart belti og aðeins goðsagnir eins og Demian Maia, BJ Penn og fleiri sem hljóta svarta beltið svo fljótt.

Til samanburðar hlaut BJ Penn svarta beltið á fjórum árum en hann hafði aðgang að heimsklassa þjálfurum á hverjum degi og hafði tök á að glíma við topp glímumenn daglega. Gunnar var hins vegar að æfa mikið með öðrum byrjendum og kenndu þeir sér mikið sjálfir af kennslumyndböndum. Hann ferðaðist þó mikið, m.a. til Hawaii, Manchester og Dublin þar sem hann fékk góða kennslu. Því er afrek Gunnars að fá svart belti á svo skömmum tíma svo sannarlega glæsilegt.

Eins og Renzo Gracie (einn af þjálfurum Gunnars og goðsögn í MMA heiminum) sagði eftirminnilega, "svart belti hylur aðeins 5 cm af rassinum á þér, þú þarft að sjá um rest" og það hefur Gunnar svo sannarlega gert.

Góður árangur á ADCC (sterkasta uppgjafarglímumót heims), gull á Pan-Ams 2009 og sjö sigrar eftir uppgjafartök í MMA sýnir það. Gunnar er án nokkurs vafa einn af allra fremstu gólfglímumönnum heims í MMA.

Hlutirnir sem hann gerir í gólfinu eru ekki flóknir og getur venjulegt blátt belti (fyrsta beltið sem BJJ iðkendur fá eftir hvíta beltið) sennilega gert margt af því sama og Gunnar gerir.

Munurinn er sá að Gunnar gerir þetta svo miklu betur en allir aðrir og hefur frábærar tímasetningar á hvenær eigi að gera réttu hreyfingarnar á réttum tíma. Slíkt er erfitt að kenna og kemur aðeins eftir þúsundir klukkustunda á dýnunum.

Styrkleikar og veikleikar

Styrkleikar

• Andlega sterkur. Að margra mati er þetta hans helsti styrkleiki. Gunnar er gífurlega yfirvegaður undir pressu og lætur fátt koma sér úr jafnvægi. Styrkurinn getur hjálpað honum að halda sér rólegum þrátt fyrir erfiðar stöður en ekki allir búa yfir þeim hæfileika.
• Frábær gólfglímumaður. Það er nokkuð ljóst að Gunnar er einn sá besti í heimi þegar kemur að gólfglímunni. Jorge Santiago (síðasti andstæðingur Gunnars) er frábær glímumaður en Gunnar komst í yfirburðarstöðu (mount) gegn honum og hélt stöðunni út lotuna. Gunnar er með sjö sigra í fyrstu lotu eftir uppgjafartök í MMA.
• Óvenjulegur stíll. Vegna karate bakgrunns Gunnars er hann mikið í því að skipta um fótastöður í standandi viðureign og það getur ruglað andstæðinga hans. Hann er með hendurnar lágt niðri og er mjög lunkinn í gagnárásum þegar andstæðingar hans vaða í hann.

Veikleikar

• Hendurnar lágt niðri. Það er alltaf erfitt að ræða veikleika á þjóðarhetjum okkar Íslendinga en enginn bardagamaður er án veikleika. Gunnar er yfirleitt með hendurnar lágt niðri og það getur reynst hættulegt. Gunnar er þó með góða fótavinnu og hreyfir höfuðið vel sem gerir andstæðingum hans erfitt fyrir að hitta hann.
• Vantar drápseðlið? 10 sigrar eftir rothögg eða uppgjafartök benda ekki til þess að það vanti neitt drápseðli í Gunnar en Dana White, forseti UFC, velti þessari spurningu fyrir sér þegar Gunnar var með Jorge Santiago vankaðan í bardaga þeirra en kláraði hann ekki.

Leið til sigurs: Gunnar er betri glímumaður en Akhmedov og ef hann nær bardaganum í gólfið mun hann sennilega klára Akhmedov með uppgjafartaki. Það ætti þó ekki að koma neinum á óvart ef Gunnar nær að rota Akhmedov þar sem hann hefur verið að æfa boxið sitt verulega mikið síðustu mánuði.

Stóra spurningin: Fyrsta lotan! Akhmedov hefur sigrað 10 af 12 bardögum sínum í fyrstu lotu og Gunnar sigrað 9 bardaga í fyrstu lotu! Mun fyrsta lotan ráða úrslitum í þessari rimmu?

Vísir og MMA fréttir hafa tekið höndum saman í umfjöllun um MMA. Pétur Marinó er ritstjóri MMA frétta og birtir fréttir úr MMA heiminum á Vísi. Ekki gleyma að setja "like" við Facebook síðu þeirra hér.