Búið að velja mótin á Prentmet-mótaröð FRÍ í ár

Frjálsíþróttasambandið hefur valið þau sex mót sem gefa stig í keppninni um stigahæsta frjálsíþróttafólk ársins á Prentmet-mótaröðinni í ár.

Mótaröð FRÍ er röð opinna frjálsíþróttamóta þar sem fremstu frjálsíþróttamenn landsins verða í eldlínunni. Keppt verður um gjafabréf á veitingastaði á öllum mótunum en mótaröðin verður jafnframt stigakeppni þar sem sigurvegarar hennar fá að lokum vegleg verðlaun frá 66°N, Intersport, Krónunni og N1.

Mótin eru sex talsins og verða fjögur þeirra á höfuðborgarsvæðinu eitt á Selfossi og eitt á Akureyri

Mótin eru:

17.maí Vormót HSK

24.maí JJ mót Ármanns

10.júní Vormót ÍR

26.júní FH-mótið

15.júlí Breiðabliksmótið

30. til 31.ágúst Akureyrarmótið

Mótaröðin verður stigakeppni þar sem hægt verður að safna stigum innan fjögurra flokka. Flokkarnir eru:

Sprettgreinar: 100m, 200m, 300m, 400m, 100/110m grindahlaup og 400m grindahlaup

Millivegalengdagreinar: 600m, 800m, 1500m, 3000m, 3000m hindrun og 5000m

Stökkgreinar: Langstökk, hástökk, stangarstökk, þrístökk

Kastgreinar: Kúluvarp, kringlukast, spjótkast og sleggjukast

Fyrir 1. sæti fást 4 stig, 2. sæti gefur 2 stig og 3. sæti 1 stig.  Einungis fást stig úr einni grein innan flokka á hverju móti.  Hægt er að safna stigum í öllum flokkum samtímis.

Öll mótin gilda til stiga.  Ef fleiri en einn íþróttamaður verður efstur í flokkastigakeppninni, mun sá sem náði mestu samanlögðum afreksstigum samkvæmt stigatöflu IAAF, úr þessum sex mótum, bera sigur úr býtum.  Besti árangur í þeim flokki sem sigur vannst í, gildir til útreikninga á afreksstigum.