Skúli tekur við karlaliði Stjörnunnar

Handknattleiksdeild Stjörnunnar tilkynnti í dag að liðið væri búið að ganga frá ráðningu á þjálfurum karla- og kvennaliðs félagsins yrir næsta vetur.

Skúli Gunnsteinsson mun taka við karlaliði félagsins af Gunnari Berg Viktorssyni. Skúli hefur stýrt kvennaliði félagsins undanfarin tvö ár með góðum árangri. Stjarnan mun leika í efstu deild næsta vetur.

Aðstoðarmaður Skúla með kvennaliðið, Ragnar Hermannsson, mun aftur á móti verða aðalþjálfari kvennaliðsins í stað Skúla.

Í tilkynningu Stjörnunnar kemur fram að það sé stefna deildarinnar að þjálfararnir komi meira að mótun yngri flokkaþjálfunar og skapi þannig heildarsamfellu í þjálfun meistaraflotta og elstu yngri flokka.