Kylfuberi lést á miðjum hring á Evrópumótaröðinni

Á meðan að Jordan Spieth, Martin Kaymer og fleiri þekkt nöfn háðu spennandi baráttu um sigurinn á Players meistaramótinu sem fram fór um síðustu helgi var ekki alveg jafn bjart yfir Madeira meistaramótinu sem er hluti af Evrópumótaröðinni og fór fram á sama tíma. Þar gerðist sá hræðilegi atburður að kylfuberinn Ian McGregor lést úr hjartaáfalli á níundu holu á Santo da Serra vellinum en hann starfaði fyrir skoska kylfinginn Alastair Forsyth.

Hlé var gert á mótinu eftir atvikið sem gerðist á lokahringnum en McGregor var 52 ára gamall og var frá Zimbabwe. Evrópumótaröðin gaf út yfirlýsingu í kjölfarið þar sem tilkynnt var um andlát hans og aðstandendum sendar samúðarkveðjur, í henni kemur einnig fram að fundað hafi verið með þátttakendum um framhaldið og ákveðið hafi verið að klára mótið.

Alastair Forsyth sýndi gríðarlegan andlegan styrk til þess að klára hringinn en spurður af fréttamönnum hvernig hann fór að því að halda áfram eftir jafn hræðilegan atburð þá svaraði hann einfaldlega, „Ian hefði viljað að ég kláraði. Hann var frábær kylfuberi og enn betri maður, það á eftir að verða erfitt að komast yfir þetta.“