Birta gervihnattargögn opinberlega

Malasísk stjórnvöld og breska gervihnattarfyrirtækið Inmarsat birtu í dag opinberlega óunnar upplýsingar úr gervitunglinu Inmarsat-3 sem hefur verið miðpunkturinn í leitinni að vélinni MH370 sem hvarf þann 8. mars.

Aðstandendur farþega týndu flugvélarinnar frá Malasíu hafa krafist þess lengi að upplýsingarnar úr gervitunglinu verði gerðar opinberar. Ekki er víst hvort upplýsingarnar gefi einhverjar vísbendingar um það hvað varð um vélina.

Með umræddum upplýsingunum er möguleiki á að sérfræðingar geti rýnt í gögnin og komið auga á einhverjar vísbendingar sem rannsóknarhópurinn gæti hafa yfirsést. Skjölin sem hafa verið birt eru alls 47 blaðsíður og nú getur hver sem er lesið úr þeim. 

Flugvélin týndist þann 8. mars á leiðinni milli Kuala Lumpur og Peking. Um borð voru 227 farþegar frá 15 löndum og tólf starfsmenn. Flestir farþeganna voru frá Kína.