Crews: NFL er sértrúarsöfnuður

NFL-deildin fékk enn eina hóplögsóknina í andlitið í gær og að þessu sinni standa 500 fyrrum leikmenn liðsins að lögsókninni.

Í henni eru læknar liðanna sakaðir um að hafa gefið leikmönnum lyfseðilsskyld lyf án þess að hafa rétt til þess. Leikmennirnir segja að þeim hafi heldur ekki verið tjáð um mögulegar hliðarverkanir sem kæmu í ljós síðar.

Þetta er ekki fyrsta hóplögsóknin gegn deildinni þar sem læknar eru sakaðir um að koma fram við leikmenn eins og skepnur svo þeir geti spilað. Margir leikmenn eru mjög illa farnir líkamlega og andlega eftir óhóflega notkun lyfja meðan á ferlinum stóð.

Stórleikarinn Terry Crews, sem meðal annars leikur í Expendables-myndum Sly Stallone, lék um tíma í deildinni og hann var á dögunum spurður út í menninguna í deildina og hvort menn segðu eitthvað þegar verið væri að sprauta þá með lyfjum sem þeir líklega vissu ekki hvað væri.

"Stemningin er eins og liðið sé faðir þinn. Menn eru beðnir um að gera allt fyrir liðið rétt eins og þeir myndui gera fyrir föður sinn," sagði Crews.

"Þetta er nánast eins og í sértrúarsöfnuði. Ég segi það bara. NFL er sértrúarsöfnuður því allir hafa horft á merki deildarinnar allt sitt líf og trúa ekki að nokkur þar myndi viljandi reyna að skaða mann."