Mayweather stendur með Ray Rice

Þeir eru ekki margir sem þora að standa með ruðningskappanum Ray Rice í dag en boxarinn Floyd Mayweather er þó einn þeirra.

Í vikunni var birt myndband þar sem Rice sést rota unnustu sína í lyftu. Í kjölfarið var hann rekinn frá félagi sínu og settur í ótímabundið bann af NFL-deildinni. Ferli hans í deildinni er líklega lokið og verður hann fyrir vikið af tugum milljóna dollara.

Hann fékk upprunalega tveggja leikja bann en þetta myndband breytti algjörlega landslaginu. Mayweather finnst það skrítið og segir að NFL hafi átt að láta tveggja leikja bannið standa.

"Það eru mikli verri hlutir í gangi inn á heimilum fólks. Það næst bara ekki á myndband," sagði Mayweather en hann fékk að dúsa í steininum í tvo mánuði á sínum tíma fyrir að ganga í skrokk á þáverandi kærustu sinni.