Skilur tilgang RÚV með nýjum reglum

Tónlistarkonan Greta Salóme Stefánsdóttir tekur hatt sinn ofan fyrir tillögu RÚV að reyna að stuðla að bættri stöðu kvenna í tónlist og kynjajafnfrétti almennt. Henni fyrst athugavert hvernig karlar hafi verið settir í forsvar fyrir umfjöllunina í fjölmiðlum og lítill áhugi sýndur almennri afstöðu kvenna gagnvart umræddum kynjakvóta.

RÚV féll í gær frá nýrri reglu er varðaði forkeppni Eurovision. Þar hafði verið lagt til að ein kona yrði að vera í höfundarteymi að minnsta kosti helmingi laganna sem kæmust í undanúrslit. Reglan fékk nokkra gagnrýni og var fallið frá henni síðdegis í gær.

„Fyrirkomulag lagavals helst því í meginatriðum óbreytt,“ sagði í yfirlýsingu frá framkvæmdastjórnar Söngvakeppninnar 2015. „Öll lög verða áfram dæmd í „blindu lagavali“, þ.e. valnefnd fær aðeins dulnefni höfunda í hendur og veit því ekki deili á höfundum innsendra laga.“

Greta Salóme, sem keppti fyrir Íslands hönd í Eurovision í Baku árið 2012, segir í pistli sem ber titilinn „Hugleiðingar um hvað teljist niðurlægjandi fyrir tónlistarkonur?“ hafa fylgst með umræðunni undanfarna daga. Hún geti vel skilið að við fyrstu sýn gæti virst sem verið væri að gera lítið úr konum. Hún skilur þó tilgang RÚV.

90 prósent Stefgjalda til karla

Tónlistarkonan, sem er þessa dagana í eldlínunni á skemmtiferðaskipinu Disney í Karíbahafinu, bendir á að rannsókn hafi verið framkvæmd í Háskóla Íslands á dögunum. Þar komi fram að 90 prósent allra stefgjalda renni til tónlistarkarla, Rás 2 hafi verið með 33 karla í þáttagerð en 11 konur, Bylgjan hafi verið með 17 karla í þáttargerð en tvær konur og FM957 með 11 karla og tvær konur.

„Í þessum töluðu orðum er til að mynda ekki ein íslensk tónlistarkona á topp 20 lista Bylgjunnar en þar eru þó 6 íslenskar hljómsveitir skipaðar einungis karlmönnum. Á topp 30 lista Rásar 2 eru aðeins tvö íslensk lög undir nafni tónlistarkonu en þrjú lög þar sem kona er meðlimur hljómsveitar eða ein af flytjendum,“ skrifar Greta Salóme og hefur greinilega áhyggjur af stöðu mála.

Þá segir hún hlutfall kvenna í hópi listamanna á Þjóðhátíð hafa verið í kringum 5 prósent bæði í ár og í fyrra.

„Það eru atriði sem þessi sem mér finnst raunverulega heyra undir fyrirsögnina ,,Niðurlægjandi fyrir tónlistarkonur.” Það er að mínu mati ekki regla í Söngvakeppni Sjónvarpsins sem mun hafa úrslitaáhrif þegar kemur að því að hvetja tónlistarkonur til að semja sína eigin tónlist, heldur allir hinir dagar ársins. En það er búið að falla frá reglunni um kynjahlutföllin í Söngvakeppninni þannig að allir geta andað léttar því að nú sitja allir við sama borð. Eða hvað?“