Gámur fauk til á Sundahöfn: Lítið tjón miðað við aðstæður

Gámur á athafnasvæði Eimskipa á Sundahöfn fauk til í óveðrinu í gær en lítið tjón varð að öðru leiti þar. Ólafur Hand, upplýsingafulltrúi Eimskipafélagsins, segir að þær ráðstafanir sem gripið var til vegna veðursins hafi gert það að verkum að tjónið varð miklu minna en búast mátti við.

„Þetta var bara mjög lítið og miklu miklu minna heldur en hefði mátt búast við miðað við hvernig veðrið varð. Þær ráðstafanir sem við höfðum gert fyrir veðrið hafði þau áhrif að tjónið varð miklu minna en búast mátti við,“ segir Ólafur.

Gámurinn sem fauk til var tómur og á viðgerðarsvæði Eimskipa. Ekki er búið að tilkynna um annað tjón eftir óveðrið. „Þetta er náttúrulega stórt svæði og menn eru búnir að vera að fara yfir það í morgun og það er ekki búið að tilkynna neitt annað en þetta,“ segir hann.

„Það er erfitt að eiga við þessar gámastæður í miklum vindi. Því menn vita í raun aldrei hvaðan kviðan kemur. Við reynum að stilla gámunum upp þannig að þeir séu ekki að taka vind á hliðina á sér en þegar kviður eru , þá getur vindurinn snúist á planinu hjá okkur,“ segir Ólafur.

Athafnasvæði Eimskipa við höfnina er stórt og talsvert var af gámum þar í nótt eins og aðrar nætur. „Við reynum að gera allar ráðstafanir og þær ráðstafanir sem við gerðum komu í veg fyrir það sem hefði getað verið mikið tjón,“ segir hann og bætir við að þeir hjá félaginu séu sáttir miðað við hvernig aðstæðurnar voru í gærkvöldi.

„Vindurinn á svæðinu var að nálgast fellibilsstyrk hérna á tímabili,“ segir hann.