Þjóðverjar gerðu það sem Dönum tókst ekki

Dagur Sigurðsson, þjálfari þýska landsliðsins, stýrði sínum mönnum til fimm marka sigurs á Argentínu, 28-23, í fjórða leik liðsins á HM í handbolta í Katar. Pólverjar unnu sinn leik öruggalega og eru stigi á eftir þýska liðinu í D-riðli.

Degi og félögum tókst þar með það sem Guðmundi Guðmundssyni og danska liðinu tókst ekki það er að vinna Argentínumenn. Þýska liðið hefur nú náð í sjö stig af átta mögulegum á mótinu.

Þjóðverjar stigu þarna stórt skref í átta að því að vinna riðilinn því síðasti leikur liðsins er á móti, Sádí-Arabíu, langlélegasti lið riðilsins.

Argentínumenn komust tveimur mörkum yfir í fyrri hálfleiknum en voru einu marki yfir í hálfleik, 14-13. Þjóðverjar skoruðu tvö fyrstu mörk seinni hálfleiksins og tóku frumkvæðið sem þeir héldu út leikinn.

Þrjú þýsk mörk í röð komu Þjóðverjum síðan í 25-21 þegar sex og hálf mínúta var eftir og eftir það var sigurinn nánast í höfn en á endanum munaði fimm mörkum.

Patrick Groetzki skoraði sjö mörk fyrir Þjóðverja og Patrick Wiencek var með sex mörk. Carsten Lichtlein var mjög góður í markinu.

Pólverjar eru einu stigi á eftir Þýskalandi eftir 19 marka sigur á Sádí-Arabíu, 32-13, en Pólverjar voru ellefu mörkum yfir í hálfleik, 17-6. Kamil Syprzak skoraði tíu mörk fyrir pólska liðið og það úr aðeins ellefu skotum og ekkert þeirra úr víti.