Graham býður stelpunni sem fór að gráta til Seattle

Sjö ára stelpan sem grét yfir því að Jimmy Graham væri á förum frá New Orleans getur brosað út í annað í dag.

Myndband af stúlkunni grátandi í bílnum með mömmu sinni eftir að hún komst að því að Graham væri á förum vakti heimsathygli.

Myndbandið fór ekki framhjá Graham sjálfum sem fékk létt samviskubit er hann sá það. Hann vildi gera eitthvað fyrir stúllkuna.

Graham gerði sér lítið fyrir og setti sig í samband við fjölskylduna. Erindið var einfalt. Hann ætlar að bjóða allri fjölskyldunni á opnunarleik hans nýja félags, Seattle Seahwks, á næstu leiktíð.

„Henni leið miklu betur eftir að hafa heyrt í Jimmy. Þetta var mjög fallegt af honum," sagði mamman.

Fjölskyldan fer því í óvænt ferðalag til Seattle næsta haust.

Hér að neðan má sjá myndbandið sem sló í gegn út um allan heim.