Segir flekaflóð hafa fallið fyrir ofan heilsugæslustöðina: „Ekki bara nokkrir kögglar“

„Það fór öll hlíðin af stað klukkan tíu mínútur í eitt þannig að þetta eru ekki bara nokkrir kögglar,“ sagði Þórarinn Steingrímsson, húsvörður og sjúkraflutningamaður á heilsugæslustöðinni í Ólafsvík, við fréttastofu 365 um flekaflóð sem fór af stað úr Tvísteinahlíð fyrir ofan heilsugæslustöðina í Ólafsvík fyrr í dag.

Stöðin var rýmd í kjölfarið klukkan 14 og var ekki talið óhætt að vera þar inni. „Þeir ákváðu að rýma stöðina því bílastæðin eru hérna beint fyrir neðan þannig að okkur fannst ekki vit í öðru en að koma fólki af svæðinu ef meira færi af stað,“ segir Þórarinn.

Árið 1995 féll snjóflóð úr Tvísteinahlíð á heilsugæslustöðinni og olli miklu tjóni. Síðan þá hefur snjóflóðavörnum verið komið fyrir í Tvísteinahlíð en um er að ræða grindur sem eiga að koma í veg fyrir að stórt flekaflóð fari af stað. Harpa Grímsdóttir, hjá snjóflóðavakt Veðurstofu Íslands, sagði í samtali við Vísi fyrr í dag að nokkrir kögglar hefðu fallið úr hlíðinni en Þórarinn segir þetta hafa verið stórt flóð.

Sjá einnig:Heilsugæslustöðin í Ólafsvík rýmd vegna snjóþunga

„Tíu mínútur í eitt þá fór öll hlíðin af stað. Þessi lausi snjór sem var ofan á harða snjónum fór allur niður og í gegnum þessi snjóflóðamannvirki sem standa upp úr snjónum ennþá. Þau eru öll orðin meira og minna full,“ segir Þórarinn. „Þetta er flekaflóð því brúnirnar sjást mjög vel,“ segir Þórarinn.

Hann segir stórar hengjur utan við snjóflóðavarnirnar í Tvísteinhlíð sem eru með stærra móti. „Við höfum ekki séð þetta í mörg ár svona stórar hengjur sem eru nýkomnar. Það er spurning hvort þær fara af stað,“ segir Þórarinn.