Manziel enn í meðferð

Einn umtalaðasti leikmaður NFL-deildarinnar, leikstjórnandinn Johnny Manziel, er að taka til í sínum málum.

Þessi partígosi og gleðipinni olli gríðarlegum vonbrigðum á sínu fyrsta ári í NFL-deildinni enda gat hann nákvæmlega ekki neitt.

Hann var duglegur að lyfta sér upp og njóta lífsins. Það var líklega ekki jafn auðvelt og hann hélt að spila í deildinni.

Manziel viðurkenndi að hann ætti við vandamál að stríða og fór því í meðferð í lok janúar. Hann er enn á meðferðarstofnuninni og ekki ljóst hvenær hann kemur út.

„Hann er alveg harður á því að ná stjórn á lífi sínu. Johnny vissi að þetta yrði að gerast og ætlar að standa sig," sagði Mike Pettine, þjálfarinn hans hjá Cleveland Browns.