„Ég held að þetta sé versta drulla sem ég hef fengið yfir mig!“

Gríðarleg reiði ríkir meðal hjúkrunarfræðinga vegna verkfallslaganna sem lögð voru fram á þingi í dag. Í lokuðum Facebookhópi fær sú reiði útrás og er eftirfarandi tilvitnun lýsandi fyrir hitann í hópnum:

„Í mínu starfi sem hjúkrunarfræðingur hef ég orðið fyrir allskyns óhróðri og ofbeldi af hendi skjólstæðinga minna. Á mig hefur verið hrækt, ælt, blætt, migið og skitið. En ég hef aldrei tekið þessu persónulega. Þetta er bara partur af mínu starfi. Starfi sem ég elska!Þessi lög, hins vegar tek ég mjög persónulega. Ég held að þetta sé versta drulla sem ég hef fengið yfir mig!“

Hjúkrunarfræðingar hafa verið að senda alþingismönnum bréf og eitt þeirra er birt í áðurnefndum hópi og meðlimum sagt velkomið að afrita það og senda.

Hjúkrunarfræðingar hóta því að flytja af landi brott

Bréfið má heita lýsandi og er svohljóðandi:



„Kæri alþingismaður.

Það virðist liggja fyrir að í dag verði lagt fyrir þig frumvarp um að samþykkja lög á verkfall heilbrigisstarfsmanna, þar á meðal hjúkrunarfræðinga. Með því að samþykkja lögin myndir þú því eiga beinan þátt í því að marka upphaf endaloka íslensks heilbrigðiskerfis í þeirri mynd sem þú þekkir það.

Þeir starfsmenn sem þú hefur í hug á að setja lög á eru stoð- og taugakerfi heilbrigðiskerfisins. Án þeirra er varla hægt að reka nokkra stofnun, annast veikan einstakling, greina né vinna að meðferð hans. Um tíu ára skeið hafa forsvarsmenn stéttarfélaga þessara heilbrigðisstarfsmanna bent á að flótti heilbrigðisstarfsmanna til annarra landa ógni getu okkar til þess að viðhalda þjónustugetu eigin heilbrigðiskerfis. Þeir flýja vegna aðbúnaðar og launastefnu íslenskra stjórnvalda gagnvart heilbrigðisstarfsmönnum. Og þeir koma ekki aftur.

Við erum að verða þjóð sem fyrst og fremst menntar framúrskarandi heilbrigðisstarfsfólk fyrir aðrar þjóðir. Þjóðir sem sannalega þekkja og virða hæfni og þekkingu íslensks heilbrigðisstarfsfólks og greiðir þeim laun sem þau geta lifað af. Tryggir þeim þann aðbúnað í starfi að þau geta sinnt því án þess að gera sjálfum sér og fjölskyldu sinni óafturkræft tjón vegna óeðlilegs álags, tækjaskorts, hás vaktahlutfalls, vaktaóreglu og mikillar fjarveru frá heimili. Allt hlutir sem útsetur þessa starfsmenn fyrir því að verða frekar fyrir neikvæðum alvarlegum afleiðingum af því að vinna svo krefjandi starf, gera mistök, verða fyrir álagstengdum sjúkdómum, upplifa ótímabæra kulnun og hverfa frá störfum.

Þú hefur annan valkost. Hafðu kjark! Stattu með þér, þinni eigin fjölskyldu og kjósendum og segðu stopp við markvissu niðurbroti á vilja heilbrigðistarfsmanna til að vinna á Íslandi. Segðu nei við kynbundnum launamun hjá ríkinu. Segðu nei við frumvarpi til laga um stöðvum verkfalls hjúkrunarfræðinga og BHM. Sýndu að þú hefur kjark Lýstu yfir vilja til þess að vinna að uppbyggingu heilbrigðisþjónustunnar. Sýndu okkur og kjósendum þínum að hjúkrunarfræðingar og aðrir heilbrigðistarfsmenn hafi ástæðu til þess að starfa á Íslandi og vinna að lausnum, að vinna að uppbyggingu.

Ef þú samþykkir lögin, þá lýsir þú því yfir að það sé ekki hægt… Að það sé ekkert í boði nema að leita annað… “

Svör þingmanna

Í hópnum er greint frá því að fáeinir þingmenn hafi svarað erindinu, þannig segir kapteinn Pírata:

„Ég stend með ykkur 100% Og þér til upplýsingar, þá hef ég aldrei samþykkt lög á verkföll síðan ég tók sæti á Alþingi.“

Ásmundur Friðriksson, þingmaður Sjálfstæðisflokks, segir: „Sæl Íris. Þakka fyrir póstinn og brýninguna. Það er sorglegt að ekki skuli hafa tekist að semja um kaup og kjör stéttar þinnar. Þar deila tveir aðilar og ábyrgðin liggur hjá þeim báðum að mínu mati og þeirri ábyrgð verð þeir aðilar að rísa undir. Staðan er algjörlega vonlaus fyrir þá sem líða fyrir verkfallið og þjóðina alla og ég verð að taka afstöðu til stöðu þeirra þegar ég greiði atkvæði. Gangi þér vel.“

Boðað hefur verið til samstöðufunda hjúkrunarfræðinga um land allt og þá er talsverð umræða um hvernig best sé að nálgast hjúkrunarleyfisumsóknir á Norðurlöndum.