„Ég kýs skjótan dauðdaga“

Örlög grísks efnahags gætu ráðist á næstu sólarhringum. Gjaldeyrishöftin eru þegar farin að bitna mjög harkalega á litlum og meðalstórum fyrirtækjum í Grikklandi og atvinnurekendur í Aþenu eru mjög svartsýnir á framtíðarhorfur. Á aðeins fjórum árum hefur tveimur þriðju hlutum allra verslana í helstu verslunargötu Aþenu verið lokað.

Ríkisstjórn Alexis Tsipras hefur fengið frest til miðnættis til að koma með tillögur umbóta sem geta orðið grundvöllur frekari lánveitinga til gríska ríkisins. Tillögurnar verða yfirfarnar á sunnudag á ríkjaráðstefnu í Brussel. Kreppan hefur leikið grísk fyrirtæki grátt. Lítil og meðalstór fyrirtæki eru kjölfestan í grísku hagkerfi en samkvæmt tölum OECD eru 60 prósent allra fyrirtækja í Grikklandi með tíu starfsmenn eða færri. Gjaldeyrishöftin í landinu koma verst niður á þessum fyrirtækjum.

Þorbjörn Þórðarson fréttamaður er í Aþenu. Hann ræddi við sjálfstæða atvinnurekendur sem hafa orðið illa úti vegna kreppu og gjaldeyrishafta. „Ég kýs skjótan dauðdaga frekan en þennan hægfara dauða,“ segir Panagiotis Mellos, slátrari og kjötinnflytjandi í Aþenu. Nick Malkoutzis er aðstoðarritstjóri enskrar úgáfu dagblaðsins Kathimerini og ritstjóri vefritsins Macropolis. Hann segir merki efnahagshnignunar alls staðar.

Sjá má frétt Þorbjarnar frá Aþenu með því að smella hér fyrir ofan.