Þór/KA skaut Valskonur niður á jörðina með stórsigri fyrir norðan

Þór/KA endaði fjögurra leikja sigurgöngu Vals í deild og bikar með sannfærandi 5-0 sigri í leik liðanna í Pepsi-deild kvenna í kvöld.

Þetta var frestaður leikur frá því úr 7. umferð en öll lið deildarinnar hafa nú spilað tíu leiki í Pepsi-deildinni í sumar.

Þór/KA var ekki búið að vinna í síðustu fimm leikjum sínum í Pepsi-deildinni og fagnaði í kvöld sínum fyrsta sigri síðan 5. júní.

Kayla June Grimsley skoraði tvö mörk fyrir norðanliðið í kvöld en hún var bara með eitt mark í níu fyrstu leikjum liðsins í sumar. Annars voru allar helstu markadrottningar Þór/KA á skotskónum í kvöld.

Það er þannig óhætt að segja að Þór/KA hafi skotið Valskonur niður á jörðina eftir mjög gott hengi Hlíðarendaliðsins á undanförnu.

Valur var búið að vinna þrjá deildarleiki í röð auk þess að tryggja sér sæti í undanúrslitum Borgunarbikarsins.

Sandra María Jessen (31. mínúta) og Klara Lindberg (44. mínúta) skoruðu mörk Þór/KA í fyrri hálfleik og staðan var 2-0 í hálfleik.

Þór/KA-liðið gekk endanlega frá leiknum með þremur mörkum á átta mínútna kafla um miðjan seinni hálfleik.

Kayla June Grimsley skoraði þriðja markið 25 mínútum fyrir leikslok, fjórða markið skoraði síðan Sarah M. Miller á 71. mínútu eftir lagleg sókn og Kayla June Grimsley var ekki hætt því hún skoraði fimmta markið skömmu síðar.

Þór/KA-liðið er enn ósigrað á heimavelli í Pepsi-deildinni í sumar (eina liðið ásamt toppliði Breiðabliks) en þetta var þó aðeins annar sigurinn hjá norðankonum því þrír heimaleikir liðsins í sumar hafa endað með jafntefli.

Valsliðið er áfram í 3. sæti deildarinnar og Þór/KA náði ekki að komast upp úr 7. sætinu en er nú aðeins einu stigi á eftir Fylki og ÍBV sem eru bæði með sextán stig í 5. og 6. sæti.

Upplýsingar um markaskorarar eru fengnar frá úrslit.net.