Bikarmeistararnir mæta í Árbæinn

Fylkir tekur á móti Stjörnunni í undanúrslitum Borgunarbikarsins í kvöld en Stjörnukonur eru ríkjandi bikarmeistarar eftir 4-0 sigur á Selfossi í úrslitaleiknum í fyrra.

Óhætt er að segja að ríkjandi Íslands- og bikarmeistararnir séu sigurstranglegri en Stjarnan hefur unnið báða leiki liðanna á þessu tímabili sannfærandi, 4-0.

Í seinni leiknum, sem fór fram á mánudaginn, skoraði Francielle Manoel Alberto, brasilísk landsliðskona sem er nýgengin í raðir meistaranna, þrennu, í sínum fyrsta leik fyrir Stjörnuna.

Fylkiskonur hafa verið á fínni siglingu að undanförnu en fyrir tapleikinn gegn Stjörnunni voru þær búnar að vinna fjóra deildarleiki í röð. Fylkir er þriðja árið í röð í undanúrslitum bikarsins en Árbæjarliðið hefur aldrei komist í bikarúrslitaleikinn.

Litlu mátti muna í fyrra er Fylkiskonur töpuðu fyrir Selfossi í vítaspyrnukeppni en þær eru eflaust staðráðnar í að komast í fyrsta sinn á Laugardalsvöll.

Hægt verður að fylgjast leik Fylkis og Stjörnunnar í beinni textalýsingu á Vísi.