Eru geimverur að fylgjast með Redskins?

Svo virðist vera sem allur heimurinn fylgist með Washington Redskins og reyndar aðeins fleiri til.

NFL-lið Redskins gaf út skýrslu í vikunni þar sem greint var frá því hversu margir hefðu farið á síðu félagsins og fylgst með æfingabúðum liðsins.

Er óhætt að segja að niðurstöðurnar hafi verið sláandi. Samkvæmt Redskins komu 7,8 milljarðar einstaklinga inn á síðu félagsins. Þarna er ekki verið að tala um smelli heldur einstaklinga sem heimsóttu síðuna.

Þetta er ótrúlegur áhugi á félaginu á svo margan hátt. Sérstaklega þar sem jarðarbúar eru aðeins 7,3 milljarðar. Það virðast því 500 milljónir geimvera einnig fylgjast með liðinu.

Redskins er því augljóslega vinsælasta lið sólarkerfisins.