Voru frábærir möguleikar á að vinna

„Við getum verið svekktir yfir úrslitunum en við getum ekki verið svekktir yfir vinnuframlagi leikmannanna í leiknum. Þeir börðust allir sem einn gegn besta liðinu sem við höfum mætt hingað til á þessu móti,“ sagði Einar Guðmundsson, niðurlútur, að leik loknum í gær.

Karlalandslið Íslands í handbolta, skipað leikmönnum 19 ára og yngri, tapaði grátlega með einu marki fyrir Slóveníu í undanúrslitum heimsmeistaramótsins en íslenska liðið leiddi um tíma með fimm mörkum í leiknum.



„Heilt yfir var þetta hörku leikur en því miður var þetta ekki nóg í dag. Fyrir mót var talið víst að Slóv­enía eða Frakkland myndu taka þetta og þetta slóvenska lið sigraði á Ólympíuleikum æskunnar í fyrra sem er gott dæmi um hversu sterkt lið þetta er. Við vissum að við værum ólíklegri aðilinn fyrir leikinn en við áttum frábæra möguleika til þess að vinna í dag sem við náðum því miður ekki að nýta okkur.“

Frábær fyrri hálfleikur

Íslenska liðið lék frábærlega í fyrri hálfleik í gær og náði um tíma fimm marka forskoti. Gekk varnarleikurinn vel og fyrir aftan vörnina var Grétar Ari Guðjónsson í miklu stuði. Leiddi það til þess að íslenska liðið fékk fjölda hraðaupphlaupa.

„Þeir áttu í miklum erfiðleikum gegn varnarleiknum okkar í byrjun leiksins. Þeir vilja spila hratt en 5-1 vörnin okkar setti þá í mikil vandræði allan fyrri hálfleikinn. Varnarleikurinn og hraðaupphlaupin voru góð í fyrri hálfleiknum en mér fannst sóknarleikurinn svolítið stirður enda var mikil harka í þessum leik,“ sagði Einar sem fannst dómarar leiksins ekki jafn flautu­glaðir í leiknum og oft áður.

„Ég er ekki að segja að við höfum tapað þessu vegna dómaranna en báðir aðilar komust upp með peysutog og annað sem er yfirleitt flautað á. Það var leyfð meiri harka í þessum leik heldur en í öðrum leikjum og fyrir vikið varð þetta öðruvísi leikur en aðrir leikir okkar hingað til.“

Þeir tóku yfir í seinni

Íslenska liðið svaraði áhlaupi Slóvenanna þegar tíu mínútur voru liðnar af seinni hálfleik en slóvenska liðið tók öll völd á vellinum korteri fyrir leikslok.

Sneru þeir stöðunni sér í hag á tíu mínútna kafla og tókst íslensku strákunum ekki að vinna upp tveggja marka forskot Slóvena á síðustu mínútum leiksins.

„Slóvenarnir náðu frumkvæðinu þarna um miðjan seinni hálfleikinn og við lentum einfaldlega skrefinu á eftir. Það var alveg sama hvað við gerðum, við reyndum að taka leikhlé en það skilaði ekki sínu. Þeir náðu að spila sinn leik á sínum mikla hraða og fyrir vikið náðum við aldrei að brjóta á þeim.“

Einar taldi að mikilvægasta stundin væri þegar Ísland var manni fleiri en slóvenska liðið náði að saxa á forskotið.

„Í svona leik þarf allt að ganga upp og undir lokin var allt að ganga hjá þeim. Fram að því fannst mér varnar­leikurinn halda vel en svo fóru fráköstin, skotin, markvarslan og allt þetta að detta þeim í hag.“

Þurfa að vera tilbúnir

Ísland leikur lokaleik sinn á mótinu gegn Spáni á morgun upp á bronsverðlaunin en Ísland vann leik liðanna í riðlakeppninni 25-24. Einar segir að menn mæti tilbúnir til leiks þrátt fyrir svekkelsið í gær.

„Ég sagði við strákana að þeir fengju klukkutíma til þess að vera svekktir og svo þyrftu þeir að hefja undir­búninginn. Við vorum búnir að vinna tuttugu leiki í röð fyrir það og þeir geta verið stoltir af því,“ sagði Einar en íslenska liðið flýgur heim frá Rússlandi snemma daginn eftir og kemur til landsins í fyrramálið.