Mikilvægur KR-sigur í Vesturbænum

KR vann gríðarlega mikilvægan 2-1 sigur á ÍBV á Alvogen-vellinum í 14. umferð Pepsi-deildar kvenna í kvöld.

KR er nú komið með níu stig en þetta var aðeins annar sigur liðsins í sumar. Sigurinn var sérstaklega mikilvægur sökum þess að Afturelding vann Þrótt í gær og komst þ.a.l. tveimur stigum upp að KR.

Sigríður María S. Sigurðardóttir kom KR í 1-0 á 35. mínútu og þannig var staðan í hálfleik.

Þórhildur Ólafsdóttir, fyrirliði ÍBV, jafnaði metin á 55. mínútu með sínu öðru marki í sumar, en hún skoraði einnig gegn KR í fyrri umferðinni.

Það var svo Chelsea A. Leiva sem tryggði KR-ingum sigurinn þegar hún skoraði annað mark liðsins á 73. mínútu.