Haukur: Kominn tími til að við hittum eins og brjálæðingar

Haukur Helgi Pálsson lék manna mest þegar íslenska körfuboltalandsliðið tapaði á móti Serbíu í þriðja leik sínum á fjórum dögum.  Hefur Haukur Helgi spilað í 92 mínútur í fyrstu þremur leikjum íslenska liðsins.

Íslenska liðið tapaði naumlega í fyrstu tveimur leikjum sínum á mótinu en liðið missti Serbana á flug í seinni hálfleiknum í gær.

„Þeir voru bara góðir. Þeir fóru að hitta úr skotunum sínum og fóru svolítið að leika sér að okkur. Þegar kemur að þessu þá þurfum við bara að fara að hamra á þeim og ekki leyfa þeim að fá auðveld sniðskot. Við héldum samt alltaf áfram," sagði Haukur Helgi eftir leik.

Fyrri hálfleikurinn var samt í takt við það sem var að gerast í fyrstu tveimur leikjunum hjá liðinu.

„Við vorum að fá fín skot í fyrri hálfleiknum en vorum bara ekki að hitta úr þeim. Það er kominn tími til að við dettum niður á einn leik þar sem að við hittum eins og brjálæðingar. Þá tökum við einn leik hérna," sagði Haukur Helgi.

Haukur segir að Serbarnir hafi nýtt sér vel körfuboltagreind sína og með því tekist að finna lausnir á varnarleik íslenska liðsins.

„Við þurfum samt að skoða hitt og þetta eins og með varnarleikinn. Þeir vissu að við vorum að fara að tvídekka á niðri við körfuna og þá biðu þeir bara og gátu síðan fundið lausa manninn út frá því. Þeir voru búnir að lesa svolítið vörnina okkar og þetta var aðeins of auðvelt fyrir þá," sagði Haukur Helgi

„Við byrjuðum mjög vel í fyrri hálfleik að gera það sem við vildum gera. Í seinni hálfleik vissu þeir alveg hvað við myndum gera og við vorum líka orðnir þreyttir líka og tókst ekki eins vel að pressa allan tímann. Þá var auðveldara fyrir þá að fá boltann inn í teig," segir Haukur.

Næsti leikur er á móti Spáni í kvöld en liðin mætast klukkan 19.00 að íslenskum tíma eða klukkan níu hér út í Berlín.

„Nú er bara annað risalið á morgun (í dag). Við þurfum að taka góða endurheimt núna. Leikurinn er klukkan níu á morgun og við fáum því meira en 24 tíma til að jafna okkur. Við þurfum bara að nýta þann tíma til að vera hjá Jóa (Jóhannes Marteinsson) og Pétri (Einar Pétur Jónsson) í sjúkraþjálfun," sagði Haukur.