De Jonge í forystu í Boston - Spieth í tómu tjóni

Kylfingurinn Brendon De Jonge frá Zimbabwe, leiðir eftir fyrsta hring á Deutsche Bank meistarmamótinu sem hófst í gær en hann lék fyrsta hring á TPC Boston vellinum á 65 höggum eða sex undir pari.

Í öðru sæti koma nokkrir þekktir kylfingar á fjórum undir pari, meðal annars Svíinn Henrik Stenson, Bandaríkjamaðurinn vinsæli Rickie Fowler og Englendingarnir Lee Westwood og Ian Poulter.

Jason Day byrjaði einnig vel og er á þremur höggum undir pari eftir fyrsta hring.

Jordan Spieth, sem hefur átt ótrúlegt tímabil hingað til, byrjaði mjög illa en hann lék á 75 eða fjórum yfir pari.

Rory McIlroy, sem komst á ný í efsta sæti styrkleikalistans eftir slæma frammistöðu Spieth um síðustu helgi á Barclays meistaramótinu, byrjaði ágætlega og er á einu höggi undir pari eftir fyrsta hring en hann lauk leik á 70 höggum.

Bein útsending frá öðrum hring hefst á Golfstöðinni klukkan 18:30 í kvöld.