Forstjóri stærsta banka Færeyja rekinn

Forstjóri færeyska bankans BankNordik, Janus Petersen, hefur verið rekinn eftir tíu ár í starfi. Þetta kemur fram í tilkynningu frá bankanum í kauphöllinni.

Núverandi fjármálastjóri bankans, Árni Ellefsen, tekur við sem forstjóri tímabundið. Bankinn segir breytingarnar síðasta lið í endurskipulagningu bankans.

BankNordik er stærsti banki Færeyja og hefur einnig 20% markaðshlutdeild í Grænlandi. Bankinn hefur jafnframt verið að bæta við sig markaðshlutdeild í Danmörku. Bankinn er skráður á markað hér á landi og á allt hlutafé í tryggingafélaginu Verði. Fyrr á þessu ári tilkynnti hann að Vörður væri í söluferli.