Sturla tryggði ÍR sigur gegn Aftureldingu

ÍR er með fullt hús stiga í Olís-deild karla í handbolta eftir dramatískan sigur á Aftureldingu í Austurberginu í kvöld, 25-24.

Þessi lið áttust við í mögnuðum oddaleik í undanúrslitum deildarinnar í fyrra og aftur var viðureign liðanna rafmögnuð í kvöld.

Sturla Ásgeirsson, hornamaður ÍR, skoraði sigurmarkið þegar um 30 sekúndur voru eftir en Jóhann Jóhansson hafði áður jafnað í 24-24.

Sturla var markahæstur í liði ÍR með níu mörk en Arnar Birkir Hálfdánsson skoraði fimm mörk.

Hjá Aftureldingu var stórskyttan Böðvar Páll Ásgeirsson markahæstur með níu mörk.

Afturelding er með tvö stig í deildinni, en liðið vann Gróttu í fyrstu umferðinni. ÍR er sem fyrr segir með fjögur stig.