Mariota hafði betur í baráttu nýju leikstjórnendanna | Öll úrslit gærdagsins

Marcus Mariota og félagar í Tennessee Titans höfðu betur gegn Tampa Bay Buccaneers 42-14 í fyrstu umferð NFL-deildarinnar í gær.

Hafði Mariota sem var valinn með öðrum valrétt í nýliðavalinu betur gegn Jameis Winston sem var valinn með fyrsta valrétt.

Það var mikið rætt um það fyrir leikinn enda ekki gerst oft að leikstjórnendur sem voru valdir með fyrstu tveimur valréttunum mætist í fyrsta leik.

Óhætt er að segja að Mariota hafi slegið í gegn en hann skilaði fjórum snertimörkum í fyrri hálfleik og hvíldi í seinni hálfleik á meðan Winston lenti í töluverðum vandræðum.

Fór fyrsta sending Winston í NFL-deildinni beint í hendur varnarmanns Titans sem náði snertimarki. Winston náði sér þó á strik eftir því sem leið á leikinn en frammistaða hans féll í skugga Mariota sem átti óaðfinnanlegan leik.

Framlengingu þurfti til þess að útkljá leik St Louis Rams og Seattle Seahawks sem töpuðu í Ofurskálinni á síðasta tímabili. Miklar væntingar eru gerðar til Seahawks á þessu tímabili en þeir töpuðu nokkuð óvænt fyrsta leik 34-31.

Dallas Cowboys lagði New York Giants í lokaleik kvöldsins 27-26 en snertimarkið sem réði úrslitum kom þegar sjö mínútur voru eftir á klukkunni. Dallas var í miklum vandræðum með sóknarleikinn framan af og tapaði boltanum alls þrisvar í hendur Giants í leiknum.

Þrátt fyrir það náði Tony Romo, leikstjórnandi Dallas Cowboys, að stýra liði sínu niður völlinn og að kasta fyrir sigur snertimarkinu til Jason Witten þegar sjö sekúndur voru eftir.

Flest önnur úrslit voru eftir bókinni en það kom töluvert á óvart að Buffalo Bills skyldi leggja Indianapolis Colts í fyrstu umferð.

Hægt er að sjá það helsta úr öllum leikjum hér.

Úrslit gærdagsins:

Chicago Bears 23-31 Green Bay Packers

Kansas City Chiefs 27-20 Houston Texans

Cleveland Browns 10-31 New York Jets

Buffalo Bills 27-14 Indianapolis Colts

Washington Redskins 10-17 Miami Dolphins

Jacksonville Jaguars 9-20 Carolina Panthers

St Louis Rams 34-31 Seattle Seahawks

Arizona Cardinals 31-19 New Orleans Saints

San Diego Chargers 33-28 Detroit Lions

Tennessee Titans 42-14 Tampa Bay Buccaneers

Oakland Raiders 13-33 Cincinnati Bengals

Denver Broncos 19-13 Baltimore Ravens

Dallas Cowboys 27-26 New York Giants.