„Þetta var svakalegur leikur, framlenging og allur pakkinn. Þetta var jafnt og við spiluðum enn og aftur frábærlega,“ sagði Pavel Ermolinskij eftir níu stiga tap Íslands fyrir Tyrklandi á Evrópumótinu í körfubolta í kvöld.
„Þetta féll ekki með okkur í lokin, við klikkuðum á nokkrum skotum og misstum svo Hauk (Helga Pálsson) af velli sem var búinn að vera frábær í leiknum,“ bætti Pavel við. Leikstjórnandinn er ánægður með framfarirnar sem íslenska liðið hefur sýnt á mótinu.
„Við tókum 45 mínútur í dag og það er mjög jákvætt. Við misstum boltann og klúðruðum skotum en erum samt alltaf inni í leiknum sem er frábært gegn ógnarsterku liði Tyrkja. Þetta var rúsínan í pylsuendanum,“ sagði Pavel. Hann segir að það hafi verið gott að fá smá „uppklapp“ í formi framlengingarinnar.
„Þetta var smá framlenging á mótinu. Eftir kreditlista í bíómyndum kemur oft svona aukaatriði. Framlengingin var eitthvað svipað.“
Íslenska liðið knúði fram framlengingu með mikilli baráttu en strákarnir hafa aldrei gefist upp á mótinu þrátt fyrir staðan hafi oft verið svört.
„Það er sagan okkar í þessu móti. Við erum þetta pirrandi litla systkini sem er alltaf að elta þig. Þú losnar aldrei við okkur og það var þannig í dag,“ sagði Pavel en hver eru næstu næstu skref íslenska körfuboltalandsliðsins?
„Við þurfum bara að byggja ofan á þetta. Kjarninn í liðinu er því miður kominn á aldur og það spurning hvað þeir eiga mikið eftir.
„Vonandi kveikir þetta einhvern neista hjá þeim og þeir halda áfram í nokkur ár í viðbót. Ef ekki þá er komið ákveðið fordæmi fyrir hvernig þetta á að vera gert og næstu kynslóðir verða bara að taka við,“ sagði Pavel að endingu.
