Kvíði og þunglyndi algengari hjá knattspyrnumönnum en almenningi

Fifpro, alþjóðasamtök atvinnumanna í knattspyrnu, hafa birt niðurstöður könnunar sem sýna að andleg veikindi líkt og kvíðaröskun og þunglyndi séu algengari meðal knattspyrnumanna en almennings.

Á þetta við um bæði núverandi og fyrrverandi atvinnumenn í knattspyrnu en alls tóku 826 einstaklingar þátt í könnun Fifpro. Helmingur þeirra spilaði í efstu deild í sínu fæðingarlandi.

Alls 38 prósent núverandi leikmanna gáfu til kynna að þeir glími við einkenni þunglyndi eða kvíða og 35 prósent fyrrverandi leikmanna. Niðurstöðurnar gáfu enn fremur til kynna að leikmenn sem verða fyrir alvegarlegum meiðslum þrívegis eða oftar á ferlinum eru fjórum sinnum líklegri til að finna fyrir einkennum andlegra veikinda.

Á dögunum fór fram málþing um andleg veikindi afreksíþróttamanna á Íslandi og hafa fjölmargir íslenskir íþróttamenn stigið fram og lýst baráttu sinni við andleg veikindi.

Vincent Gouttabarge, einn forsvarsmanna Fifpro, vonast til að niðurstöður könnunarinnar verði til þess að það verði fyrr hægt að veita íþróttamönnum sem glíma við veikindi aðstoð.