Fresta þurfti 120 skurðaðgerðum í verkfallinu

Hundrað og tuttugu skurðaðgerðum var frestað á Landspítalanum fyrstu tíu daga verkfalls SFR stéttarfélags og Sjúkraliðafélags Íslands. Einungis bráðum og brýnum aðgerðum var sinnt á meðan verkfallinu stóð og eru biðlistar nú helmingi lengri en á sama tíma í fyrra.

Þá voru um 1.300 færri komur á dag- og göngudeildir á meðan verkfallinu stóð, sé litið til sama tíma árið 2014, að því er segir á vef Landspítalans. Einnig kemur fram að ekki sé hægt að sjá afgerandi fækkun á fjölda inniliggjandi sjúklinga þar sem deildir hafi verið yfirfullar við upphaf verkfalls. Legutími hafi jafnframt lengst.

Öllum bráðainnlögnum var sinnt en fimm daga endurhæfingardeild aldraðra var lokuð frá upphafi verkfallsins.