Söluaukning hjá öllum þýsku bílaframleiðendunum

Mikill vöxtur þýsku lúxusbílaframleiðandanna heldur áfram og seldu Audi, BMW og Benz öll meira í október en í sama mánuði í fyrra. Minnst söluaukning var þó hjá Audi, eða 2% og seldi fyrirtækið 149.200 bíla. BMW seldi 164.915 bíla og jókst salan um 6,3%. Söluaukningin var þó mest hjá Mercedes benz, eða um 10% og nam 155.189 bílum.

Því stefnir í að Mercedes Benz muni ná Audi sem næst söluhæstu þýski lúxusbílaframleiðandinn, en Audi hefur haldið þeim titli frá árinu 2011. BMW hefur lengi verið söluhæst þessara þriggja.

Hjá Audi féll salan í Kína um 2,8%, jókst um 3,4% í Evrópu, en um heil 17% í Bandaríkjunum. Heildarsalan hjá Audi á árinu hefur vaxið um 3,6% og stendur nú í 1,5 milljónum bíla. Hjá BMW hefur vöxturinn verið 5,6% og salan 1,56 milljón bíla og hjá Mercedes Benz nemur vöxturinn 15% og salan 1,53 milljónir bíla.

Sannarlega lítill munur á þessum þremur þýsku keppinautum. Það mun væntanlega auka hressilega söluna hjá Audi þegar sala á nýjum Audi A4 hefst fyrir alvöru, en salan í Evrópu hófst í þessari viku.