"Árið 2008 var ég í bullinu"

Breska fyrirsætan Jourdan Dunn var valin fyrirsæta ársins á bresku tískuverðlaununum sem fóru fram í London í gærkvöldi.

Dunn, sem er 25 ára gömul, sagði er hún tók við verðlaunum frá vini sínum fatahönnuðinum Olivier Rousteing, að verðlaunin væru kærkomin, sérstaklega þar sem "árið 2008 hafi hún verið í bullinu" (e.hot mess).

Dunn fór ekki nánar út í þá sálma en Rousteing smellti af þeim sjálfsmynd á sviðinu og brugðu þau einnig á leik baksviðs fyrir ljósmyndara eins og sjá má hér fyrir ofan. 

Dunn hefur gert það gott undanfarið ár og meðal annars setið fyrir hjá stórfyrirtækjum á borð við H&M, Burberry, Topshop, Prada og Victoria´s Secret.