Síhækkandi afslættir nýrra bíla í Bandaríkjunum

Meðalafsláttur á nýjum bílum sem seldir voru í Bandaríkjunum voru 3.104 dollarar í október. Það er 14% hærri afsláttur en að meðaltali í október í fyrra og er að meðatali 9,5% af meðalverði þeirra. Meðalverð seldra bíla þar vestra var 32.529 dollarar í október.

Salan í október var mjög góð, en hluti skýringar þess hlýtur að liggja í því hve bílaframleiðendur bjóða vel þessa dagana. Mikil samkeppni virðist ríkja á markaðnum sem lýsir sér í þessum auknu afsláttum og svo virðist sem mikið kapssmál sé að ljúka árinu á góðri sölu.

Stefnir í mesta bílasöluár frá upphafi

Sumir greinendur hafa gengið svo langt að segja að bílaframleiðendur séu að kaupa sér góða sölu með öllum þessum afsláttum, en á meðan eru kaupendur glaðir og endurnýja bíla sína sem aldrei fyrr, enda stefnir í besta bílasölu ár Bandaríkjanna í ár.

Bílasala þarf aðeins að aukast um 3% á síðustu tveimur mánuðum ársins til að árið verði það besta í sögunni, en vöxturinn hefur verið talsvert meiri það sem af er ári. Vöxturinn í október var t.d. 14%.

Dæmi um allt að 20% afslátt

Dæmi eru um það að bílaframleiðendur hafi boðið svo hátt sem 20% afslátt af bílum sínum og er Chevrolet Cruze dæmi um það, en verðlistaverð hans er 20.920 dollarar, en Chevrolet hefur boðið 4.184 dollara afslátt á honum og hann því í boði á 16.736 dollara, eða 2,2 milljónir króna.

Bílaframleiðendur segja hinsvegar að framlegð af sölu bíla þeirra sé há og hefur Ford náð 11,3% framlegð af þeim bílum sem seldir hafa verið í N-Ameríku í ár og General Motors 11,8%. Toyota, Honda, Mazda og Subaru hafa einnig sýnt vænar framlegðartölur.