Subaru bílar með hæstu mögulegu einkunn IIHS

Bandaríska umferðaröryggsistofnunin IIHS (Insurance Institute for Highway Safety) hefur veitt Subaru hæstu mögulega einkunn fyrir framúrskarandi öryggi í Subaru Legacy, Outback, Forester, Impreza, Crosstrek og WRX sem seldir eru á markaði Norður-Ameríku.

Bílarnir eru búnir nýja forvarnarkerfinu EyeSight sem Subaru þróaði fyrir bíla sína. Allar bílgerðirnar fengu einkunnina „2016 TOP SAFETY PICK+(TSP+)“. Að auki fengu bílarnir hæstu einkunn (Good) í fimm mismunandi árekstrarprófum og síðan hæstu einkunn (Superior) fyrir frábæra vörn í framanákeyrslu.

Forvarnarkerfið EyeSight sem Subaru þróaði er hið fyrsta sinnar tegundar í bílum og er margverðlaunað um allan heim vegna eiginleika sinna og mikils forvarnargildis. Kerfið tengir saman tvær myndavélar sem staðsettar eru innan við framrúðuna og senda litmyndir í þrívídd til tölvu bílsins sem kann að bera kennsl á lögun hluta og greina hraða og fjarlægðir með næstum sömu nákvæmni og mannsaugað býr yfir.

EyeSight gerir líka greinarmun á gangandi vegfarendum, reiðhjólum, mótorhjólum og bílum og skynjar að auki hemlaljós og fleira. Subaru vann að þróun kerfisins í 20 ár áður en það var sett á alþjóðamarkað í bílum fyrirtækisins sl. vor.