Dregið úr leit við Ölfusá: Guðmundur Geir talinn af

Maðurinn sem leitað hefur verið við Ölfusá undanfarna daga er nú talinn af og verður dregið úr umfangi leitarinnar næstu daga. Maðurinn hét Guðmundur Geir Sveinsson og var 41 árs.

Guðmundur féll í ána við Selfosskirkju að kvöldi jóladags eða snemma á aðfaranótt annars í jólum. 

Hann var fæddur 13. apríl 1974 til heimilis að Kringlumýri 4 á Selfossi og var ókvæntur og barnlaus, að því er segir í tilkynningu frá lögreglunni. Eftirlifandi faðir hans og bræður hafa óskað eftir því að koma að einlægum þökkum til allra þeirra björgunarsveitarmanna og annarra sem lagt hafa lið við leitina.