Nyegaard: Ísland á ekki möguleika í danska liðið

Bent Nyegaard, fyrrverandi handboltaþjálfari og einn þekktasti sérfræðingur Dana um íþróttina, var ánægður með að Danmörk fékk Ísland í 16-liða úrslitum HM í handbolta. Liðin eigast við í kvöld.

„Eins og staðan er núna finnst mér að Ísland standi hvergi nærri danska landsliðinu. Ég sé í raun ekki fyrir mér að Ísland eigi möguleika en við þekkjum þó söguna og vitum að leikir liðanna hafa oft verið jafnir og spennandi,“ sagði Nyegaard í samtali við Fréttablaðið í gær.

Helsti munurinn á liðunum er breidd leikmannahópsins og markvarðastöður liðanna að mati Nyegaard. „Þar hafa Danir mikla yfirburði,“ segir hann en bætir við að Ísland geti, á góðum degi, verið hættulegur andstæðingur líkt og liðið sýndi í æfingaleik liðanna í byrjun mánaðarins.

„Þá tókst okkur ekki að leysa hlaupin hjá Snorra [Steini Guðjónssyni] og línuspilið á [Róbert] Gunnarsson. Danir spiluðu afar illa í þeim leik en engu að síður sé ég bara ekki fyrir mér að Danmörk eigi í vandræðum með lið þar sem gæðamunurinn í nokkrum stöðum er svo yfirgnæfandi mikill, Danmörku í hag.“

Erfitt að meta íslenska liðið

Þegar viðtalið var tekið var óvíst hvort Aron Pálmarsson myndi spila með íslenska liðinu í kvöld eftir höfuðhöggið sem hann fékk gegn Tékklandi í síðustu viku. Aron missti af leiknum gegn Egyptalandi sem tryggði strákunum sæti í 16-liða úrslitum keppninnar.

„Ég vona að Aron spili með í leiknum því ég tel að það sé betra ef lið undirbýr sig að spila gegn sterkasta mögulega liði andstæðingsins,“ segir Nyegaard og bætir við að það hafi verið erfitt að meta íslenska liðið út frá frammistöðu þess til þessa.

„Alexander Petersson er leikmaður í hæsta gæðaflokki en hann hefur átt erfitt í þessu móti. Þá hefur Ásgeir [Örn Hallgrímsson] komið inn og staðið sig vel. Guðjón Valur [Sigurðsson] skoraði þrettán mörk gegn Egyptalandi en ekkert gegn Tékklandi. Svo átti [Björgvin Páll] Gústavsson skyndilega góðan leik gegn Egyptalandi. Maður veltir fyrir sér í hvaða stöðu liðið er.“

Væri stórslys að tapa

Nyegaard segir að staðan á danska liðinu sé ágæt þó svo að hann telji að það eigi enn mikið inni. Frammistaða liðsins gegn Póllandi hafi gefið það í skyn.

„Það er meira í vændum frá danska liðinu ef allt gengur upp í 60 mínútur. Pólland er ekki andstæðingur í hæsta gæðaflokki. Liðið gerði 17 mistök í gær en Danmörk 12. Þetta var því ekki toppleikur í gær, hvernig sem á það er litið,“ segir hann.

„En vörnin hefur verið að þéttast hjá Dönum og ég á erfitt að sjá fyrir mér að Snorri muni valda jafn miklum usla í danska liðinu og hann gerði fyrir tveimur vikum.“

Það kæmi honum þó ekki á óvart að Ísland myndi stíga upp og spila góðan leik þrátt fyrir allt sem á undan er gengið.

„Ég hins vegar býst við að Danir geri það líka. Enda væri það stórslys fyrir danskan handbolta að detta út á þessu stigi mótsins. Miðað við stöðuna á íslenska liðinu finnst mér það góður kostur að mæta Íslandi nú. Guðmundur og Aron eru báðir klókir þjálfarar og afar færir en Guðmundur hefur nú forskot á Aron því hann er með langtum betra lið í höndunum. Hvað mig varðar er það bara svo einfalt.“