Markalaust hjá Leverkusen og Bayern München

Bayer Leverkusen og Bayern München gerðu markalaust jafntefli í síðasta leik dagsins í þýsku úrvalsdeildinni í fótbolta.

Þrátt fyrir jafnteflið er Bayern enn með átta stiga forskot á toppi deildarinnar. Þeirra helstu keppinautar, Borussia Dortmund, gerðu einnig markalaust jafntefli í dag, við Hertha Berlin.

Leverkusen hefur verið á mikilli siglingu að undanförnu en liðið hefur fengið 11 stig úr síðustu fimm leikjum sínum. Lærisveinar Roger Schmidt eru í 5. sæti deildarinnar með 32 stig.

Bayern lék einum færri síðustu sex mínútur leiksins eftir að Xabi Alonso fékk að líta rauða spjaldið.