Yahoo segir upp fimmtán prósentum starfsfólks

Bandaríski tæknirisinn Yahoo tilkynnti í kvöld að fyrirtækið hyggst segja upp fimmtán prósentum af starfsfólki sínu og loka fimm skrifstofum víðsvegar um heim. Hlutabréfaverð í fyrirtækinu hefur fallið um 35 prósent á síðastliðnu ári.

Greint var frá áformum Yahoo á sama tíma og fyrirtækið birti nýtt ársfjórðungsuppgjör sem var nokkuð jákvæðara en sérfræðingar töldu fyrirfram. Sala nam 1,27 milljörðum bandaríkjadala, rúmlega 165 milljörðum íslenskra króna, en jafnvel var talið að salan gæti hafa farið undir milljarð dala í fyrsta sinn í ellefu ár.

Áform fyrirtækisins gera ráð fyrir því að draga úr kostnaði á þessu ári um rúmlega fimmtíu milljarða króna.