Ísland got Talent: Fjórtán ára söngkona gefur Adele ekkert eftir

Jóhanna Ruth Luna Jose fór á kostum í Ísland got Talent í gærkvöldi á Stöð 2. Hún er 14 ára og kemur frá Filippseyjum.

Fyrsti þáttur þriðju seríu var sýndur í gærkvöldi og var Jóhanna meðal þeirra sem fram komu í honum.

„Pabbi minn er mikið fyrir tónlist og mamma mín er mikið að syngja þannig að ég lærði mikið frá þeim,“ segir Jóhanna.

„Ég ákvað að taka þátt því mér finnst gaman að koma fram fyrir fullt af fólki og ég er líka að gera þetta fyrir fjölskylduna mína. Ég ætla verða söngkona í framtíðinni.“

Áheyrnarprufan hennar byrjaði kannski ekki nægilega vel og stöðvaði Ágústa Eva Erlendsdóttir hana eftir nokkrar sekúndur. Hún spurði hana hvort Jóhanna gæti sungið annað lag. Þá tók Jóhanna lagið Set Fire to the Rain með Adele. Það heppnaðist svona líka vel og fékk hún fjögur já með sér heim.

Atriði hennar má sjá í spilaranum hér fyrir ofan.