Íslenska kvennalandsliðið í íshokkí vann annan flottan sigur annan daginn í röð á heimsmeistaramóti kvenna en Ísland keppir í B-riðli 2. deildar.
Íslensku stelpurnar unnu 8-2 sigur á Nýja-Sjálandi í dag eftir að hafa unnið 7-2 sigur á Tyrkjum í gær.
Þrjár konur skoruðu mörk Íslands í leiknum. Silvía Björgvinsdóttir var með fernu og Sunna Björgvinsdóttir skoraði 3 mörk og gaf eina stoðsendingu að auki. Þriðji markaskorari íslenska liðsins var Guðrún Viðarsdóttir.
Guðrún gaf tvær stoðsendingar í leiknum eins og þær Sarah Shantz-Smiley, Flosrún Jóhannesdóttir og Kristín Ingadóttir.
Íslenska liðið gaf tóninn strax í byrjun með því að vinna fyrsta leikhlutann 5-1 en vann síðan hina tvo líka, annan leikhlutann 2-1 og lokaleikhlutann 1-0. Íslensku stelpurnar voru komnar í 5-0 eftir aðeins rúmar fimmtán mínútur.
Ísland mætir heimastúlkum frá Spáni í þriðja leik sínum á fimmtudaginn en spænska liðið hefur unnið tvo fyrstu leiki sína á mótinu, 11-1 sigur á Nýja-Sjálandi og 3-0 sigur á Mexíkó.
Sunna og Silvía báðar með þrennu | Tveir stórsigrar í röð
Tengdar fréttir
Íslensku stelpurnar rúlluðu upp Tyrkjum á HM
Íslenska kvennalandsliðið í íshokkí byrjaði frábærlega í 2. deild heimsmeistaramótsins sem fer fram í Jaca á Spáni.
