Vincent Kompany, fyrirliði Manchester City, verður frá næsta mánuðinn vegna kálfameiðsla.
Kompany þurfti að fara af velli snemma leiks þegar City gerði markalaust jafntefli við Dynamo Kiev á Etihad í 16-liða úrslitum Meistaradeildar Evrópu í gær. City vann fyrri leikinn í Úkraínu 1-3 og er því komið áfram í 8-liða úrslit í fyrsta sinn í sögu félagsins.
Kompany missir þó væntanlega af fyrri leiknum í 8-liða úrslitunum sem fer fram annað hvort 5. eða 6. apríl.
„Hann verður frá í a.m.k. mánuð,“ sagði Manuel Pellegrini, knattspyrnustjóri City, eftir leikinn í gær.
„Vincent verður að vera sterkur andlega. Það er erfitt að sætta sig við þetta en það er ekkert annað í boði,“ bætti Sílemaðurinn við.
Kompany er tíður gestur á sjúkralistanum en þetta er í 14. sinn sem hann meiðist á kálfa síðan hann kom til City 2008.
Mikilvægi Belgans fyrir City er gríðarlegt en liðið hefur fengið á sig mark á 156 mínútna fresti þegar hann er inn á vellinum en á 70 mínútna fresti án hans.
Fjórtándu kálfameiðsli Kompanys | Frá í mánuð hið minnsta
Tengdar fréttir
Markalaust hjá Norwich og Man. City
Norwich og Manchester City gerðu óvænt markalaust jafntefli í ensku úrvalsdeildinni í knattspyrnu.
Koeman: Arsenal og Man City eru úr leik í titilbaráttunni
Ronald Koeman, knattspyrnustjóri Southampton, segir að Arsenal og Manchester City séu úr leik í baráttunni um enska meistaratitilinn.
Ranieri: Arsenal og Man. City geta ennþá unnið titilinn
Claudio Ranieri, knattspyrnustjóri toppliðs Leicester City, lítur ekki á það þannig að Leicester og Tottenham muni berjast um enska meistaratitilinn í átta síðustu umferðunum. Hann telur að bæði Arsenal og Manchester City séu enn með í baráttunni.
