Æpandi þögn á stjórnarheimilinu

Vísir hefur reynt að ná tali af Sigmundi Davíð Gunnlaugssyni forsætisráðherra í allan dag vegna umræðu undanfarinna daga í kjölfar frétta af því að Wintris, félag eiginkonu hans, hafi lýst yfir kröfum sem nema 500 milljónum króna í þrotabú föllnu bankana. Án árangurs.

Hér neðar má sjá fyrirspurnina en þar er þess óskað að fá viðtal við Sigmund Davíð og spurningar sendar með til að fyrir liggi um hvað málið snýst. Til vara er þá að spurningunum verði svarað skriflega. Enn hafa engin svör borist.

Hvers vegna greindi hann ekki Bjarna frá stöðu mála?

Í nokkra daga hefur legið fyrir fyrirspurn hjá aðstoðarmanni Sigmundar Davíðs, Jóhannesi Þór Skúlasyni, varðandi það hversu mikið fékkst upp í kröfur Wintris í slitabúin og hvaða eignir eru í félaginu. Engin svör hafa borist.

Þingmenn stjórnarandstöðunnar hafa rætt mögulega vantrauststillögu á forsætisráðherra. En, þá skiptir afstaða þingmanna Sjálfstæðisflokksins öllu máli. Samkvæmt heimildum Vísis er þolinmæðin í herbúðum Sjálfstæðisflokksins, þá hvað varðar stjórnarsamstarfið, nánast á þrotum.

Þar á bæ spyrja menn ekki hvers vegna Sigmundur Davíð hafi ekki greint opinberlega frá þessum hagsmunatengslum, þá er hann eðli máls samkvæmt, hefur komið að afnámi fjármagnshafta, þó Bjarni Benediktsson fjármálaráðherra hafi leitt það starf. Heldur er spurningin: Hvers vegna greindi Sigmundur Davíð Bjarna ekki frá stöðu mála? Sjálfstæðismenn líta á það sem trúnaðarbrot milli flokkanna auk þess sem framganga ýmissa þingmanna Framsóknarflokksins, svo sem það að Frosti Sigurjónsson hafi greitt atkvæði gegn einstökum liðum fjárlagafrumvarps, svo eitt dæmi af mörgum sé nefnt, fara mjög fyrir brjóstið á Sjálfstæðisflokknum.

Sigmundur verður að stíga fram

Þó ekkert vanti uppá að óbreyttir þingmenn Framsóknarflokksins hafi látið í sér heyra, eins og Vísir greindi frá í gær en þar voru stóru orðin hvergi spöruð, þá er þögn forystunnar hávær og þá ekki síður þögn foringja Sjálfstæðismanna. Vísir hefur ítrekað reynt að ná tali af Bjarna Benediktssyni formanni Sjálfstæðisflokksins, en án árangurs. Sama máli gegnir um Ólöfu Nordal varaformann sem og Ragnheiði Ríkharðsdóttur þingflokksformanns en í tvo daga samfellt hefur Vísir reynt að ná tali af henni, en án árangurs. Hún svarar ekki skilaboðum.

Þannig má ljóst vera að málið allt er mjög viðkvæmt. Vilhjálmur Bjarnason þingmaður Sjálfstæðisflokksins tjáði sig um málið um helgina, sagði að þetta hlyti að þýða það að traust milli flokka væri minna eftir en áður en svo virðist sem hann muni ekki njóta opinbers fulltingis annarra í flokknum. Ekki að sinni. Samkvæmt heimildum Vísis bíða menn þess nú, innan Sjálfstæðisflokksins, að Sigmundur Davíð stigi fram. Sem hann hljóti að gera, sem hann verði að gera, og skýra sína hlið mála. Þá spyrja menn einnig, og telja sig hafa vissu fyrir því að ekki séu enn öll kurl til grafar komin og því telji menn vissara að segja sem minnst eins og staðan er nú. Og staðan er pólitískt ómöguleg.

Fyrirspurn Vísis frá í morgun

Heill og sæll Jóhannes!

Ég fer hér með, og vinsamlegast, fyrir hönd Vísis fram á viðtal við Sigmund Davíð Gunnlaugsson forsætisráðherra.

Spurningarnar sem ég vildi bera fram eru meðal annars og á þessa leið:

a)  Nú þegar fram hefur komið að félagið Wintris Inc., í eigu eiginkonu þinnar, hafi lýst yfir kröfum sem nema 500 milljónum króna í þrotabú föllnu bankana; má þá ekki segja að þar með hafi hæfi þitt til að koma að afnámi fjármagnshafta verið umdeilanlegt?

b)  Stangast þessi staða þín ekki á við óskráðar meginreglur stjórnsýsluréttar við meðferð mála, almennt? Hver er afstaða þín til þess?

c)  Hefði ekki verið heppilegra, og eðlilegra, að upplýsa um þessa stöðu mála og hagsmunatengsl áður en til þess kom að gengið var til samninga við kröfuhafa?

d)  Nú hafa talsmenn ríkisstjórnarinnar talað um kosti krónunnar, mikla möguleika íslensks efnahagslífs og mikilvægi þess að fjársterkir (Íslendingar) komi með fé sitt til landsins til að taka þátt í endurreisn eftir hrun. Skýtur þá ekki skökku við að á sama tíma er fjölskylda þín með góðan skerf fjármuna sinna á reikningi á Bresku Jómfrúaeyjum?

Með allra bestu kveðjum og ósk um skjót viðbrögð.