Þurfum að hjálpa þeim út úr skápnum og láta vita að þau eru ekki ein í heiminum

Líney Rut Halldórsdóttir, formaður Íþrótta- og Ólympíusambands Íslands, fagnar þeirri umræðu sem er farin af stað um samkynhneigða íþróttamenn, en vefurinn gayiceland.is hefur opnað verulega á umræðuna með viðtölum við leikmenn og þjálfara.

Kári Garðarsson, þjálfari Íslands- og bikarmeistara Gróttu í Olís-deild kvenna, kom út úr skápnum 26 ára gamall sem leikmaður en mun sjaldgæfara er að karlmenn í íþróttum komi út úr skápnum. Aðeins eru sárafá dæmi um slíkt.

„Það er töluvert af samkynhneigðum stelpum sem hafa verið í þessum boltaíþróttum en það hefur verið minna karlamegin í boltagreinunum. Það skortir fyrst og fremst fyrirmyndir og ef maður horfir erlendis þá eru leikmenn að koma út úr skápnum þegar ferlinum lýkur,“ sagði Kári í viðtali við Akraborgina fyrr í vikunni.

Leggjumst á eitt

Kári hefur rætt við ÍSÍ sem hefur sett af stað átak um fræðslu í þessum málum í samstarfi við íþróttafélagið Styrmi og fleiri sem koma að málinu.

„Það er ekki hægt að segja að við höfum ekkert gert en við getum klárlega gert meira og staðið okkur betur,“ sagði Líney Rut í Akraborginni á X977 í dag.

„Við höfum verið með þetta á borði hjá okkur í smá tíma og reynt að finna leiðir til að gera eitthvað. Það er ekki nóg að gefa út einn bækling. Frá því þessi umræða hófst núna erum við búin að hafa samband við samtökin og við fengum samtal við formann íþróttafélagsins Styrmis.“

„Við ætlum að leggjast öll á eitt og finna leið til að kveða niður þessa fordóma og líka bara að hjálpa til við þessa orðræðu. Þetta er ekkert einskorðað við íþróttahreyfinguna. Almennt þarf bara að breyta því hvernig orðræðan er í dag,“ sagði Líney.

Efla fræðslu

Líney segir að fjölmiðlar geti gert mikið til að hjálpa til og bendir hún á viðtalið við Kára og svo annað mjög áhugavert viðtal við Guðjón Val Sigurðsson, fyrirliða karlalandsliðsins í handbolta, sem má finna hér.

„Þetta hjálpar til að opna og sýna þeim sem ekki eru komnir út úr skápnum að þeir eru ekki einir í heiminum,“ segir Líney Rut.

„Það eru kannski minni fordómar en viðkomandi heldur að séu til staðar. Ég heyrði bara á Kára að þegar hann loksins tók þetta skref var það minna mál en hann sjálfur hélt. Vonandi er það þannig allsstaðar,“ en hvað ætlar ÍSÍ að gera?

„Við þurfum að hjálpa til að fræða þjálfara og stjórnendur í félögum enn betur um hvernig er hægt að taka á málum og hvernig þeir geta verið betur í stakk búnir og taka á orðbragði sem getur verið meiðandi.“

„Við viljum efla þessa fræðslu innan þjálfaramenntunar okkar. Þar getum við klárlega komið inn efni til að uppfræða og hjálpa til því oft á tíðum er þetta bara fáfræði,“ segir Líney Rut Halldórsdóttir.