Þúsund hestafla Evantra Millecavalli

Þeir leynast margir óþekktir bílaframleiðendurnir sem þó framleiða afar athygliverða bíla. Einn þeirra er ítalski framleiðandinn Mazzanti Automobili sem nú kynnir þennan Evantra Millecavalli bíl sem skartar hvorki meira né minna en 1.000 hestöflum undir húddinu.

Þessi bíll er af gamla skólanum hvað drifrás varðar, en hann styðst ekki við rafmagnsafl að neinum hluta, heldur gríðarlegt sprengirými 7,2 lítra V8 vélar og tvær stórar forþjöppur. Tog þessarar vélar er gríðarmikið, eða 1.200 Nm. Því kemur það ekki svo á óvart að það tekur þennan bíl aðeins 2,7 sekúndur að ná 100 km hraða og það hjálpar til við snerpuna að bíllinn vegur aðeins 1.300 kíló.

Mazzanti Automobili ætlar að kynna þennan bíl í Tórínó í næsta mánuði. Aðeins verða framleidd 25 eintök af bílnum og víst er að verð þeirra verður hátt en bílar Mazzanti Automobili hafa einna helst selst í Kína, Rússlandi, í arabalöndunum og í Evrópu. Fyrirtækið Mazzanti Automobili var stofnað árið 2002.