Nýráðinn þjálfari KR í stjórn knattspyrnudeildar Breiðabliks

Willum Þór Þórsson, nýráðinn þjálfari KR, er í stjórn knattspyrnudeildar Breiðabliks, en hann er þar meðstjórnandi samkvæmt heimasíðu Breiðabliks. Hann var ráðinn þjálfari KR út tímabilið í kvöld.

Hann tekur við af Bjarna Guðjónssyni og Guðmundi Benediktssyni, en þeim var sagt upp störfum um helgina eftir slakt gengi KR á leiktíðinni hingað til.

Willum tók sæti í stjórn Breiðabliks á aðalfundi knattspyrnudeildar þann 9. mars á þessu ári, en hann situr einnig á Alþingi sem þingmaður Framsóknarflokksins.

Hjá Breiðablik er hann meðstjórnandi í stjórn knattspyrnudeildar, en formaður er Borghildur Sigurðardóttir. Varaformaður er Vilhelm Þorsteinsson.

Ekki náðist í Borghildi Sigurðardóttir við vinnslu fréttarinnar, en rætt var við Willum í kvöldfréttum Stöðvar 2 þar sem hann sagðist ekki hafa getað sagt nei við uppeldisfélagið.

Líklegt er að Willum taki sér tímabundið frí frá stjórnarstörfum eða hætti alfarið.